أاااااه لو تقبلنى يارب "كلام من القلب للقلب"2

السلام عليكم ورحمة الله وبركاته

إخوتى كيف حالكم مع الله؟
ثم كيف حالكم مع أنفسكم؟
أدعوا الله مخلصة أن تكونوا بخير

أعلم أن سؤالى قديم وانه اصبح ممل بالنسبة للبعض ولكن تذكروا اخوتى انه مهم جدا حتى لو نسأل انفسنا به فهو من اسئلة محاسبة النفس.

اليوم سنكمل الجزء الثانى من درس أه لو ترضى عنى
إليكم الدرس:

{فقلت استغفروا ربكم انه كان غفاراً}

يعنى ايه يعنى يارب مقلتش حاجة صعبة ماقلتش حاجة غريبة مقلتش طلاسم لا انا قلت كلام جميل يدخل القلب ويساعد على التقرب منك قلتلهم ها ياشباب مالكم بعيد عن ربنا ليه ايه اللى مكرهكم فيه ايه باعدكم عن طريقه بس خايفين ما يفتحلكوش الباب لا ده غفار انتوا مش عارفين اد ايه هو غفور بيغفر الذنوب ده هو كمان اللى بعت لنا الرسل والانبياء عشان نآمن وهو اللى فاتحلنا باب التوبة طول الوقت مش بوقت معين وهو اللى بينزل وقت السحر يقول هل من تائب اتوب عليه هل من مستغفر اغفر له هل من داعى استجب له ، هو ربنا وهو برضه اللى امر كاتب الحسنات يكتب الحسنة اول ماتعملها وامر كاتب السيئات يستنى 6 ساعات مايكتبهاش يمكن تتوب وان تبت يمحيها والحسنة بعشر امثالها وان ما تبتش يكتبها سيئة واحدة ، انتوا ليه مش عايزينه دا غفور اوى ورحيم اوى ده كمان لو ماتبتش بيقولك عبدى لو جئتنى بقراب الارض خطايا لجئت بقرابها مغفرة وهو برضه اللى بيقول عبدى لو بلغت ذنوبك عنان السماء ثم لقيتنى لا تشرك بى شئياً غفرت لك ولو عشت عمرك كله تعصيه وبعدين جيت تقولله هاتقبلنى يارب يفتحلك الباب ويغفرلك ويفرح بيك ويقولك احببتنا فاحببناك وعصيتنا فأمهلناك وإن عدت الينا قبلناك

مفيش حاجه تمنعك انك ترجعله دا كمان لما تتوبوا هايستر عليكم ذنوبكم ومش هايعايركم ولا يفضحكم

طيب حد ها يسأل وانا هاكسب ايه من الرجوع لله اسمع ياسيدى

{يرسل السماء عليكم مدراراً} السما هاتتفتح ابوابها وهاينزل عليكم منها الخير كله كانه مطر نازل

{ويمددكم بأموال وبنين ويجعل لكم جنات ويجعل لكم انهارا}

مال ومطر وزرع وزواج واولاد ما هو كله من عند الله وكله اتقطع عننا بسبب المعاصى والبعد عن ربنا ما هو كله اتقطع من معاصينا لما نتوب هايدينا وهايعوضنا عن كل اللى فات واللى اتحرمنا منه

طيب يارب مش الاول تذكر الانهار وبعدين الجنة هى هاتيجى منين الجنة الا بالانهار؟

لا انا هاديكوا بدون سبب يعنى انا مش هاستنى تاخدوا بالاسباب لا انا هانعم عليكم من عندى من خيرى ومن كرمى بس ارجعوا وتوبوا

ارجعوا يا شباب وانت تلاقوا شغل ارجعوا يا بنات وانتوا تتجوزوا ارجعوا يا مصريين وانا ازود نعمى عليكم ومايبقاش فيه غلاء تانى ارجعوا يا مسلمين العالم وانا اخليكوا تتحدوا تانى وارفع راية الاسلام تانى

ارجعوا وانا ارجعكوا جيش لا ينهزم تانى بس ارجعوا

قولوا يارب بدمعة صادقة وايد طاهرة وجسد سليم مفيهوش معاصى

{مالكم لا ترجون لله وقاراً}

يعنى ليه مش عايزين ترجعوا ده 950 سنه دعوة عشان ترجعولى مالكم بتحسبوها ازاى فين عقلكم قلبك اتحمل انك تتحدى ربنا بالمعاصى؟

مالكم مستهترين ليه فاكرين انكم مش هاتقولوا رب ارجعون هاتقولوا لما تشوفوا سكرة الموت وهتقولوا لما تسألى فى القبر وهاتقولوا لما تتعذبوا فى القبر وبعدها يوم القيامة وبعدها جهنم وبئس المصير

ياااااااااااااااااه على حزنك وقتها

انتوا فاكرين ان الحياة لعبة ومفيش حساب

{وقد خلقكم أطواراً}

كنت ايه زمان يا مليونير ويا ملياردير وياللى فرحان بصحتك وقوتك إو نفوذك أو سلطتك أو ... وانت كنتى ايه يافنانه ياللى فرحانه بعريك وجسمك اللى باين وانت حيوان منوى

وهنا يكون انتهى هذا الجزء ويبقى الجزء الثالث والاخير
انتظرونى غداً إن شاء الله

سبحانك اللهم وبحمدك أشهد أن لا إله إلا أنت أستغفرك وأتوب إليك.
والسلام عليكم ورحمة الله وبركاته

شـكــ وبارك الله فيك ـــرا لك ... لك مني أجمل تحية .

وعليكم السلام ورحمه الله ,,
جزيتي خيير اسال الله ان لايحرمك اجر جهودك

بارك الله فيك و جزاك الله خيرا على الموضوع